Vətəndaşlar daşınmaz əmlak barədə məlumatları elektron üsulla əldə edə bilirlər

Vətəndaşlar daşınmaz əmlak barədə məlumatları elektron üsulla əldə edə bilirlər.

Əmlak Məsələləri Dövlət Komitəsindən (ƏMDK) AZƏRTAC-a bildirilib ki, komitə vətəndaşlara sahib olduqları əmlaklar barədə heç bir yerə getmədən, internet vasitəsilə ətraflı məlumat almaq imkanı yaradır. Bu “Daşınmaz əmlakla bağlı dövlət reyestrindən məlumatın verilməsi” elektron xidməti sayəsində mümkündür. Fəaliyyətində daima yeniliklərin, innovativ üsulların tətbiqinə önəm verən ƏMDK bu xidməti tətbiq etməklə əhalinin qeydiyyatla bağlı işini sadələşdirir. Həmin elektron xidmət vasitəsilə əmlakın sahibi, yerləşdiyi ünvan, sahəsi barədə məlumatları öyrənmək mümkündür. Başqa sözlə, əmlakın həm ölçüləri və texniki göstəriciləri haqqında informasiyanı əldə etmək olur. Eyni zamanda, əmlakla bağlı aparılan əməliyyatlar barədə də informasiya əldə etmək olur. Yəni, vətəndaşda ipoteka, girov, alqı-satqı, bağışlanma, kimi əməliyyatların edilib-edilməməsi ilə bağlı məlumatları bilmək imkanı yaranır.

Bu sərfəli xidmət sayəsində vətəndaşlar evi və ya ofisi tərk etmədən, sadəcə internet vasitəsilə onlara tələb olunan bütün məlumatları alırlar. Nəticədə bunun üçün ərazi qeydiyyat idarələrinə getmək və ərizə yazmağa ehtiyac qalmır. Əmlak sahibi rahat və çevik şəkildə daşınmaz əmlak barədə dövlət reyestrində qeydiyyata alınmış məlumatlarla tanış olur. Bununla həm vətəndaş-məmur münasibətləri minimuma enir həm də insanların vaxt itkisi aradan qaldırılır. Bu elektron xidmət təkcə əhali üçün deyil, dövlət qurumları, fiziki və hüquqi şəxslər, banklar və digər daşınmaz əmlak sahibləri üçün də faydalıdır. Belə ki, xidmət əmlakla bağlı əməliyyatlar edən zaman yarana biləcək nöqsanların aradan qaldırılmasına imkan verir. Başqa sözlə, bəzən əmlakla əməliyyatlar zamanı müxtəlif anlaşılmazlıqlar, alıcı və satıcıların aldadılması halları baş verir. Bəziləri insanların etibarından istifadə edərək başqasına məxsus əmlakı özününkü kimi təqdim edir və ya onun ölçüləri və digər göstəriciləri bərədə düzgün olmayan məlumatlar verirlər. Bu isə əmlakın alıcısı üçün risklər yaradır. “Daşınmaz əmlakla bağlı dövlət reyestrindən məlumatın verilməsi” elektron xidməti isə bütün məsələləri, yerindəcə yoxlamağa imkan verir. Belə ki, alıcı, sadəcə satıcıdan bu xidmətdən istifadə etməsini istəyir və sistemin göstərdiyi məlumatlarla özü də tanış olur.

Adı çəkilən xidmət internet üzərindən həyata keçirilməklə iş adamları üçün xüsusilə əlverişlidir. Belə ki, bu xidmət hətta xaricdə olduqda da əmlak barədə lazımi məlumatı almağa və qarşı tərəfə təqdim etməyə imkan verir. Nəticədə iş adamları bu məsələyə qətiyyən vaxt itirmirlər.

Başqa mühüm amil xidmətdən istifadə etmək üçün “elektron imza”nın tələb olunmamasıdır.

Ümumilikdə xidmət alqı-satqı prosedurlarının sadələşməsinə, daşınmaz əmlak bazarında aktivliyin artmasına, operativliyin təmin edilməsinə şərait yaradır.

Bu xidmətdən istifadə etmək üçün komitənin elektron xidmətlər portalına (e-emdk.gov.az) və ya Elektron Hökumət portalına daxil olmaq lazımdır. Əmlak sahibi portalda lazımi xidmətə keçid etdikdən sonra iki xana açılır. Bu xanaların hər birində daşınmaz əmlakın reyestr və qeydiyyat nömrəsi daxil edilir. Daha sonra xidmət haqqı olaraq ödəniləcək məbləğ ekranda əks olunacaq. İstifadəçi “Kartın növü” sətrində xüsusi işarə vasitəsilə ödəniş edəcəyi elektron kartın növünü seçərək “Ödə” düyməsini seçməlidir. Qeyd edək ki, xidmətin istifadəsi üçün 10 manat dövlət rüsumu nəzərdə tutulub. Rüsumu elektron qaydada ödədikdən sonra ekranda əmlakla bağlı məlumatlar görünür. Bura əmlakın reyestr nömrəsi, qeydiyyat tarixi, ünvanı, torpağın və tikilinin sahəsi, tikilinin mərtəbə və otaq sayı, hüquq sahibi barədə məlumatlar aiddir.

Elektron xidmətlərin tətbiqində başlıca məqsəd modern və çevik idarəetmənin təmin edilməsi, fəaliyyətin səmərəliliyinin artırılması, şəffaflığının təmin olunması, bürokratiyanın aradan qaldırılması, vətəndaş məmnunluğunun yüksəldilməsi, xidmətlərə əlçatanlığın artırılmasıdır. Eyni zamanda, xidmətlərin optimallaşdırılması, prosedurların sadələşdirilməsi, məlumatların axtarılmasına və əldə edilməsinə sərf olunan vaxtın maksimum azaldılması da əsas vəzifələrdəndir.