Mayın 7-də Astara rayonunun Kijəbə qəsəbəsində Azərbaycan Respublikası Dövlət Gömrük Komitəsinin Tibbi Xidmət İdarəsinin səyyar hospitalı və Mərkəzi Gömrük Hospitalının peşəkar həkimlərindən ibarət tibbi heyətinin iştirakı ilə “Ürək-damar sistemi xəstəliklərinə qarşı mübarizə” layihəsi çərçivəsində ümummilli lider Heydər Əliyevin anadan olmasının 96-cı ildönümünə həsr olunmuş xeyriyyə aksiyasına start verilib.

Üç gün davam edəcək humanitar aksiya çərçivəsində Mərkəzi Gömrük Hospitalının ürək cərrahı, tibb elmləri doktoru, Milli Məclisin deputatı Rəşad Mahmudovun rəhbərliyi ilə hospitalın təcrübəli kardioloqları rayon əhalisinə tibbi xidmət göstərəcək.

Aksiya zamanı tibbi yardıma ehtiyacı olan rayon sakinləri kardioloqlar tərəfindən müayinə olunur, Exo, EKQ doppler müayinə edilir və səhhətində problem olan vətəndaşlara peşəkar tibbi yardım göstərilir.

Ümumdünya Səhiyyə Təşkilatının məlumatına əsasən dünyada qeyri-infeksion xəstəliklər səbəbi ilə baş verən ölüm hallarının əksəriyyəti damar sisteminin xəstəlikləri ilə bağlıdır. Bununla bağlı Mərkəzi Gömrük Hospitalının keçirdiyi “Ürək-damar sistemi xəstəliklərinə qarşı mübarizə” humanitar layihəsi çox böyük əhəmiyyət kəsb edir. Bu gün vaxtında üzə çıxarılmış ürək xəstəliyi və onun vaxtında aradan qaldırılması yüzlərlə insana sağlamlıq bəxş etmək deməkdir.

Qeyd edək ki, Dövlət Gömrük Komitəsinin Tibbi Xidmət İdarəsi tərəfindən belə xeyriyyə tədbirlərinin Azərbaycanın digər rayonlarında da keçirilməsi nəzərdə tutulub.

Ürək cərrahı Rəşad Mahmudov jurnalistlərə verdiyi müsahibəsində bildirib ki, aksiyanın məqsədi Mərkəzi Gömrük Hospitalının səyyar tibbi xidmət briqadası ilə birlikdə regionlara səfər etmək, ən ucqar kəndlərə qədər gedib ürək-damar problemlərindən əziyyət çəkən insanlarla bilavasitə təmasda olmaq, rayon yerlərində bəzən həkimə getməyə imkanı olmayan insanlara ən yüksək texnologiyalar əsasında diaqnostik müayinələr aparmaqdır.

Aksiya zamanı, həmçinin insanlar xolesterin, təzyiq, şəkər kimi problemlərlə bağlı maarifləndiririlir, xəstəliklərlə əlaqədar problemlərini yerindəcə həll edib gələcək fəsadların əmələ gəlməməsi üçün onlara doğru müalicə və profilaktik məsləhətlər verilir.

16 nəfərdən ibarət həkim briqadası üç gün ərzində ürək-damar xəstəlikləri, o cümlədən bu sahə ilə əlaqəli daxili orqanlarda olan problemləri və böyrək patologiyalarını müayinə edəcək. Həkim briqadasında anadangəlmə ürək qüsurları üzrə yüksək ekspertlər də var.

Xeyriyyə aksiyasında 500 nəfərə yaxın rayon sakininin müayinəsi nəzərdə tutulub.

Rayon icra hakimiyyətinin başçısı Qəzənfər Ağayev müayinəyə gəlmiş rayon sakinləri ilə görüşüb və onların problemləri ilə maraqlanıb.

İcra başçısı Ulu Öndərin layiqli davamçısı Prezident cənab İlham Əliyevin bütün sahələrə olduğu kimi, səhiyyə sahəsinin də inkişafına göstərilən diqqət və qayğıdan ətraflı bəhs edərək ölkəmizdə yeni-yeni tikilib istifadəyə verilən xəstəxana, poliklinika, diaqnostika mərkəzləri məhz uğurla həyata keçirilən səhiyyə infrastrukturun yeniləşdirilməsinə, tibbi xidmətin səviyyəsinin yüksəldilməsinə və səhiyyənin inkişafına xidmət etdiyini diqqətə çatdırdı.

Rayon sakinləri aksiyanın təşkilatçılarına, hər zaman əhalinin sağlamlığının qayğısına qalan Prezident İlham Əliyevə öz dərin minnətdarlıqlarını bildiriblər.

İcra hakimiyyətinin başçısı Qəzənfər Ağayev səyyar hospitalda yaradılmış şəraitlə tanış olub.

Fəridə Söhrabqızı

Foto-Nicat Raufoğlu

Astarainfo.az