Yasamal rayonu Dadaş Bünyadzadə küçəsində Daxili İşlər Nazirliyi əməkdaşlarının keçirdiyi əməliyyatdan sonra polislər tərəfindən lentə alındığı müşahidə olunan bir neçə görüntü sosial şəbəkələrdə yayılıb. 
Məsələ ilə bağlı Yeniavaz.com-a açıqlama verən Daxili İşlər Nazirliyinin mətbuat katibi Ehsan Zahidov bildirib ki, sözügedən videolardan bəziləri qurum tərəfindən sübut kimi paylaşılıb:
“Bütün hüquq-mühafizə orqanlarında, o cümlədən xüsusi xidmət orqanlarında keçirilən tədbirlər lentə alınır. Bu da o məqsədlə alınır ki, istintaq və təhqiqat prosesində bundan istifadə olunsun, araşdırmalarda istifadə olunsun. Yəni sırf xidməti istifadə üçün bunlar lentə alınır. Dünyanın hər yerində bu qayda var, yəni bu yolveriləndir. Biz də orada onları lentə almışıq, lakin təlimatı pozaraq onu yayn əməkdaş müəyyən olundu və cənab nazirin əmri ilə də daxili işlər orqanlarından qovuldu. Videoların bir hissəsini sübut kimi özümüz yaymışdıq. Amma icazə olmadan video yayan, həmin o qadına kobud ifadə işlədən əməkdaş da, Daxili İşlər nazirinin əmri ilə daxili işlər orqanından qovuldu”.
Digər videoları yayan polis əməkdaşları ilə bağlı sualımıza isə E. Zahidov belə cavab verdi: 
“Həmin videolardır, sadəcə yeniləyirlər”.
Polis əməkdaşları tərəfindən yayılmış görüntülərdə saxlanılan şəxslərə qarşı zor tətbiq olunması ilə bağlı kadrlara mətbuat katibi belə münasibət bildirdi:
“Heç kəsə zor tətbiq edilməyib. Sakinlər özləri xidmətdə olan polis əməkdaşlarına qarşı kobudluq ediblər, onları təhqir ediblər, üzərinə zibil atıblar, qanuni tələblərinə tabe olmayıblar. Polis də adekvat tədbir görərək onları saxlayıb”.

Astarainfo.az