Bazarda qiymət artımı ABŞ-da şist nefti istehsalını dəstəklədiyi üçün Neft İxrac Edən Ölkələr Təşkilatı (OPEC) yaxın müddətdə qlobal neft artığından yaxa qurtara bilməyəcək.

AZƏRTAC xəbər verir ki, bunu Beynəlxalq Enerji Agentliyinin (IEA) neft bazarları üzrə nümayəndəsi Neil Atkinson deyib. O bildirib ki, neft ehtiyatlarını son beş ilin həcminə salmaq üçün uzunmüddətli iş görmək lazımdır. Bazarda yenidən tarazlığın yaranması isə çox çətin prosesdir.

Qeyd edək ki, ötən il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb. Neft hasilatının azaldılması üzrə sazişə müvafiq olaraq Azərbaycan iyulda hasilatı sutkada 35 min barrel azaltmaqla bağlı götürdüyü öhdəliyi tam yerinə yetirib. Ölkə üzrə gündəlik neft hasilatı yanvar ayı ərzində 793,9 min barrel, fevralda 776,4 min barrel, martda 733,3 min barrel, apreldə 781,1 min barrel, mayda 785,3 min barrel, iyunda isə 793,7 min barrel olub. Mayın 25-də OPEC Nazirlər Şurasının 172-ci iclası çərçivəsində OPEC-ə üzv və qeyri-üzv dövlətlər arasında neft hasilatının azaldılmasına dair sazişin müddətinin 2018-ci ilin birinci rübünün sonunadək uzadılması barədə razılıq əldə olunub.