Yaponiyanın “Panasonic” elektronika istehsalçısı “IFA 2017” beynəlxalq sərgisi çərçivəsində ilk dəfə ictimaiyyətə “OLED” matrisalı şəffaf televizor prototipini təqdim edib.
AZƏRTAC xəbər verir ki, yeni texnologiya “ağıllı şüşə” adlanır. Hazırda belə panellərdə teleseriallara və filmlərə baxmaq müəyyən narahatlıq yaradacağı üçün onlardan harada istifadə oluna biləcəyini təsəvvür etmək çətindir. Lakin mütəxəssislər əmindir ki, gələcəkdə onları “ağıllı” mebelə, müxtəlif məişət texnikasına inteqrasiya, eləcə də interyer bəzəyi kimi istifadə etmək mümkün olacaq.
Şəffaf televizor ekranının təsvir ölçüsü 3840×2160 piksel təşkil edir ki, bu da “Ultra HD” standartına bərabərdir. Qurğu tam multimedia mərkəzi funksiyalarına, o cümlədən internetə çıxış, musiqi dinləmək, səsli komandaların tanınması imkanlarına malikdir.
“Panasonic” şirkətinin sərgi stendində televizor gözəl demoversiya nümayiş etdirib, qurğunun altında isə müxtəlif animasiyaları göstərən əlavə ekran quraşdırılıb. Ekranın arxasında, həmçinin sərgi iştirakçılarının panelin şəffaflığını qiymətləndirməsi üçün iki şəffaf şüşə piramida yerləşdirilib.
