“Qarabağ” Avropanın ən məhsuldar klubları arasında 177-ci yerdədir

Avrokubokların ən məhsuldar klublarının siyahısı açıqlanıb. Apasport.az saytının məlumatına görə, UEFA-nın tərtib etdiyi cədvəldə qitənin 10 ən çox qol vuran komandası yer alıb.

Yalnız bir klub qitə kuboklarında 1000-dən artıq qol vurub. Bu da İspaniya “Real”ıdı. “Kral klubu”nun ən yaxın izləyicisi “Barselona”dı. 3-cü sırada “Bavariya” qərarlaşıb.

UEFA-nın cədvəlində ilk “onluq”dan başqa seçilmiş 10 kluba da yer verilib. Həmin klubların qol, oyun sayı, orta məhsuldarlığı, həmçinin mövqeyi əks olunub.

UEFA-nın seçilmişləri Çempionlar Liqasındakı iştirakına görə müəyyənləşib. Burada Azərbaycan çempionu “Qarabağ” da var. Ölkəmizin Avropadakı ən uğurlu təmsilçisi həm də ən məhsuldar komandamızdı. 86 matçda 87 dəfə fərqlənən ağdamlılar qol sayında Avropada 177-cidi.

UEFA orta məhsuldarlıqda da ən yaxşını müəyyənləşdirib. Bu cədvəldə Mönhenqladbax “Borussiya”sı hamıdan öndədi. Ən azı 100 oyun keçirən komandaların müqayisəsində 3 klub hər görüşdə 2-dən çox qol vurub. “Borussiya”nın ən yaxın izləyiciləri “Real”la “Ayntraxt” da buna nail olub. Orta məhsuldarlıq üzrə ilk “beşlik”də “Barselona” və “Bavariya” da yer alıb.