Hazırda Fransada yaşayan Azərbaycanın Əməkdar artisti, Fransa Ali Beynəlxalq Musiqi Akademiyasının direktoru, dünya şöhrətli pianoçu Adilə Əliyevanın adına iki ildən bir pianoçuların beynəlxalq müsabiqəsi keçirilir. 1996-cı ildən keçirilən müsabiqədə peşəkar və gənc pianoçular iştirak edirlər.
Koronavirus pandemiyası səbəbindən 300 nəfərdən çox ifaçının qatıldığı builki müsabiqə onlayn formada təşkil edilib.
Astarainfo.az xəbər verir ki, Beynəlxalq müsabiqə laureatı, Astara Uşaq Musiqi Məktəbinin VII sinif şagirdi Aysu Mustafazadə də müsabiqəyə qatılıb.
O, öz yaş qrupuna uyğun müsabiqənin hər üç turunun proqramını videoçəkiliş edərək münsiflər heyətinə təqdim edib.
Dünyanın müxtəlif ölkələrindən olan ifaçıların qatıldığı müsabiqənin finalına çıxan 25 nəfər ifaçı arasında Astara Uşaq Musiqi Məktəbinin müəllimi Aybəniz Dadaşovanın yetirməsi olan Aysu Mustafazadə də olub.
Astaralı gənc musiqiçi Adilə Əliyeva adına XV Beynəlxalq müsabiqədə üçüncü yeri tutaraq laureat adına layiq görülüb.
