Astara rayonunda avtomobillərin ixrac qazlarının tərkibində olan zərərli maddələrin atmosferi çirkləndirməsinin qarşısının alınması məqsədilə nəzarət-profilaktiki tədbirlər davam etdirilir.
Astarainfo.az xəbər verir ki, bu məqsədlə Astara Rayon Polis Şöbəsinin Dövlət Yol Polisi bölməsinin əməkdaşları tərəfindən nəqliyyatın hərəkətinin sıx olduğu küçə və prospektlərdə növbəti reydlər keçirilib.
Reyd zamanı sürücülərlə bir daha izahat işləri aparılıb və diqqətə çatdırılıb ki, istifadələrində olan avtomobillərin yanacaq sistemini tənzimləməklə onları saz vəziyyətə gətirməli və ixrac qazlarının tərkibinin normalara uyğunlaşdırılmasını təmin etdikdən sonra istismarına yol verməlidirlər.
Müəyyən olunmuş standartlara cavab verməyən avtomobillərin sürücüləri barəsində inzibati qaydada tədbirlər görülüb.
Reyd zamanı, həmçinin yol polisi əməkdaşları tərəfindən ictimai nəqliyyatda tibbi maskadan istifadə ilə bağlı tələbləri pozan sürücü və sərnişinlər, idarə etdiyi nəqliyyat vasitəsinə konstruksiya dəyişikləri edənlər, avtomobili sürücülük hüququ olmadan idarə edənlər aşkarlanıb.
Onların hər birinə yol verdikləri qayda pozuntuları izah olunmaqla, barələrində qanunamüvafiq tədbirlər görülüb.
Yol hərəkətinin təhlükəsizliyinin təmin olunması məqsədini daşıyan belə tədbirlər bundan sonra da mütəmadi şəkildə davam etdiriləcək.
