Rayon icra hakimiyyətinin başçısı Qəzənfər Ağayev Astara güləş məktəbinin yetirməsi, sərbəst güləş üzrə Avropa çempionu Rzazadə Əliabbas Hafis oğlunu qəbul etmişdir.
İcra başçısı Əliabbas Rzazadəni təbrik edərək qeyd etmişdir ki, ölkə Prezidenti cənab İlham Əliyevin rəhbərliyi ilə ölkəmiz bütün sahələrdə sürətlə inkişaf edir, indi Azərbaycan dünyada həm də bir idman ölkəsi kimi tanınır. Ölkə rəhbərinin idmana və idmançılara göstərdiyi xüsusi diqqət və qayğısından ruhlanan gənclərimizin idmanın müxtəlif növlərində beynəlxalq yarışlarda uğurlar qazanaraq dünya arenalarında Dövlət Himnimizi səsləndirməklə Şanlı Bayrağımızı yüksəklərə qaldırması hər birimizi qürurlandırır, iftixar hissi yaşadır.
Cənab Prezidentin həmişə yüksək dəyər verdiyi, inandığı Azərbaycan gəncləri təkcə idmanda deyil, həm də əsl vətənpərvərlik nümayiş etdirərək 44 günlük Vətən müharibəsində qazandığımız tarixi Zəfərin də təminatçıları oldular. Qəhrəman oğullarımız düşməni darmadağın edərək tarixi torpaqlarımızı işğaldan azad etdilər. İndi müqəddəs Azərbaycan Bayrağı həmin ərazilərdə qürurla dalğalanır. Qələbəmizi həzm edə bilməyən mənfur düşmən bu günlərdə Azərbaycan və Türkiyənin bayraqlarını yandırmaqla xəbisliyini və cılızlığını bütün dünyaya bir daha nümayiş etdirdi.
Avropa çempionatında sənin və qardaş Türkiyə idmançısının qələbəsi şərəfinə yanaşı qaldırılan Azərbaycan və Türkiyə Bayraqları düşmənlərimizə növbəti tutarlı cavab oldu. Bu möhtəşəm qələbə münasibətilə səni təbrik edir, daha böyük uğurlar arzulayıram.
Sərbəst güləş üzrə Avropa çempionu Əliabbas Rzazadə növbəti dəfə səmimi qəbula və xoş sözlərə görə icra başçısı Qəzənfər Ağayevə minnətdarlıq etmişdir.
Qeyd etmişdir ki, 2007-ci ildən güləşlə məşğuldur. 2013-cü ildən Azərbaycan yığma komandasının üzvüdür. 2014-cü ildə sərbəst güləş üzrə yeniyetmələr arasında Respublika çempionu olmuş, gənclər arasında 2016-cı ildə Rumıniyada keçirilən Avropa və Fransada keçirilən dünya çempionatlarında bürünc medal qazanmışdır. 2018-ci ildə İtaliyada keçirilən Avropa çempionatında bürünc, 2021-ci ildə Makedoniyada keçirilən U-23 Avropa çempionatında gümüş, Serbiyada keçirilən U-23 dünya çempionatında qızıl medal qazanmışdır. 2022-ci ildə Macarıstanın Budapeşt şəhərində keçirilən Avropa çempionatında gümüş medal, Türkiyənin Konya şəhərində keçirilən İslam Həmrəyliyi Oyunlarında bürünc medal qazanmış, İtalyanın Roma şəhərində keçirilən Qran-Prinin çempionu olmuşdur. 2023-cü ilin fevralında Xorvatiyanın paytaxtı Zaqreb şəhərində keçirilən Qran-Prinin çempionu və apreldə həmin şəhərdə keçirilən sərbəst güləş üzrə Avropa çempionatında qızıl medal qazanmışam. İndi də sentyabrda keçiriləcək dünya çempionatına hazırlaşıram. Ən böyük arzum dünya çempionatı və Olimpiya Oyunlarında qalib gələrək Azərbaycanın Dövlət Himnin səsləndirilməsi və Bayrağımızın ucaldılmasına nail olmaqdır.
İcra başçısı Əliabbas Rzazadəni bir daha təbrik etmiş, ona gələcək yarışlarda uğurlar diləmiş, Fəxri Fərman və qiymətli hədiyyə ilə mükafatlandırmışdır.
