Sentyabr ayı xalqımızın yaddaşına zəfərə açılan yol kimi həkk olunsa da, qanla yazılmış şanlı səhifə, eyni zamanda, bizi ürəkdən sarsıdan şəhid xəbərləri ilə yaddaşlarda qaldı. 19 sentyabr 2023-cü il tarixində Rusiya Sülhməramlı Kantingentinin müvəqqəti yerləşdiyi Azərbaycan ərazisində qeyri-qanuni erməni terrorçu dəstələri tərəfindən Ordumuzun mövqelərinə qarşı silahlı təxribatlar törədildi. Azərbaycan Silahlı Qüvvələrinin həyata kerçirtdiyi lokal xarakterli “Antiterror” əməliyyatı nəticəsində düşmənə laiqli cavab verilmiş və 24 saat ərzində düşmən ağ bayraq qaldıraraq təslim olmuşdur.
Təəssüflər olsun ki, bu əməliyyatlar zamanı Ordumuz şəhidlər vermişdir. Onların içərisində rayonumzdan iki nəfər: Babazadə Əli Rüstəm oğlu və Eynəliyev Samrad İkram oğlu qəhrəmancasına döyüşərək şəhid olmuşdur.
Şəhid Babazadə Əli 13 iyul 1990-cı ildə Astara şəhərində anadan olmuşdur. 2008-2009-cu illərdə həqiqi hərbi xidmət keçmiş, 2012-ci ildən Azərbaycan Silahlı Qüvvələrinin sıralarında müddətdən artıq hərbi qulluqçu kimi xidmət edirdi. Aprel döyüşləri və Vətən müharibəsində rəşadətli Azərbaycan Ordu sıralarının tərkibində düşmənə qarşı döyüşmüş, torpaqlarınmızın işğaldan azad olunmasında fəal iştirak etmişdir.
Babazadə Əli 19 sentyabr 2023-cü ildə “Antiteror” əməliyyatı zamanı şəhid olmuş, sentyabrın 20-də doğulduğu Kələdəhnə yaşayış massivində yerləşən qəbiristanlıqda böyük izdihamla dəfn olunmuşdur. Şəhidimiz ailəlidir, iki uşaq atasıdır.
Eynəliyev Samrad İkram oğlu 08 avqust 2005-ci ildə Astara rayonunun Şəmətük kəndində anadan olmuşdur. 2023-cü ildə Səfərbərlik və Hərbi Xidmətə Çağırış üzrə Astara rayon şöbəsi tərəfindən həqiqi hərbi xidmətə çağrılmış, Azərbaycan Silahlı Qüvvələrinin tərkibində əsgər kimi xidmət edirdi. 19-20 sentyabr döyüşlərində qəhrəmancasına döyüşərək şəhid zirvəsinə ucalan Eynəliyev Samrad doğulduğu Şəmətük kənd qəbiristanlığında sentyabr ayının 22-də rayon ictimaiyyətin nümayəndələrinin iştirakı ilə izdihamla dəfn edildi.
Müstəqilliyimizin və torpaqlarımızın işğaldan azad olunması uğrunda həlak olmuş bütün şəhidlərimizə Allahdan rəhmət diləyirik!
