Astara rayonunun sənayesinin əsasını qida məhsulları istehsalı, kərpic istehsalı, elektrik enerjisi, qaz və buxar istehsalı, bölüşdürülməsi və təchizatı, su təchizatı, tullantıların təmizlənməsi və emalı sahələri təşkil edir.
2023-cü ilin yanvar-sentyabr aylarında sənaye müəssisələri və bu sahədə fəaliyyət göstərən fərdi sahibkarlar tərəfindən istehsal olunmuş malların və göstərilmiş xidmətlərin həcmi 4,8 faiz artaraq 25637,6 min manat təşkil etmişdir. Sənaye məhsulunun 33,0 faizi emal, 66,4 faizi elektrik enerjisi, qaz və buxar istehsalı, bölüşdürülməsi və təchizatı, 0,6 faizi isə su təchizatı, tullantıların təmizlənməsi və emalı sektorlarında istehsal olunmuşdur.
Sənayedə qeyri-dövlət sektorunun payı 33,0 faiz olmuşdur.
İstehsal edilmiş məhsulun böyük hissəsi istehlakçılara göndərilmiş, əvvəlki dövrlərdə yaranmış ehtiyatlar da nəzərə alınmaqla sənaye müəssisələrinin anbarlarında 01 oktyabr 2023-cü il vəziyyətinə 1068,2 min manatlıq hazır məhsul olmuşdur.
Emal sənayesində ev təsərrüfatlarında sənaye məhsulu istehsalının, habelə hüquqi şəxs yaratmadan fərdi sahibkar kimi fəaliyyət göstərənlərin işinin qiymətləndirilməsi də nəzərə alınmaqla yanvar-sentyabr aylarında 8450,3 min manatlıq məhsul istehsal olunmuş və sənaye xarakterli xidmətlər göstərilmiş və keçən ilin müvafiq dövrünə nisbətən 51,7 faiz artım olmuşdur.
Elektrik enerjisi, qaz və buxar istehsalı, bölüşdürülməsi və təchizatı sektorunda doqquz ay ərzində 17022,6 min manat dəyərində məhsul istehsal olunmuş və xidmətlər göstərilmiş, əvvəlki ilin yanvar-sentyabr ayları ilə müqayisədə 2,5 faiz artım müşahidə olunmuşdur.
Su təchizatı, tullantıların təmizlənməsi və emalı sektorunda istehsal edilmiş məhsulların həcmi 13,6 faiz azalaraq 164,7 min manat təşkil etmişdir.
Vasif Həsənov,
Astara Rayon Statistika İdarəsinin rəisi
