Astarainfo.az “Hüquqi Yardım” İB-nin mətbuat xidmətinə istinadən xəbər verir ki, “Hüquqi Yardım” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Cənub regionunda insan alveri və məcburi əməyə dair məsələlərdə əhalinin məlumatlandırılması” layihəsi çərçivəsində Lənkəran şəhər şəhərində rayonda fəaliyyət göstərən QHT nümayəndələri, rayon ictimaiyyəti və gənclər təşkilatlarının nümayəndələri üçün insan alveri və məcburi əməyə həsr olunan məsələlərlə bağlı bir günlük təlim keçirmişdir.
Təlim iştirakçılarına insan alveri və onun doğurduğu acı nəticələr barəsində bilgi verilmiş təlim materialları və rol oyunları ilə zəngin olan məlumatlarlə maarifləndirilmiş. Təlimdə ”Hüquqi Yardım” ictimai birliyinin sədri İlqar Qasımov və layihə üzrə təlimçi insan alveri, bu bəlanı doğuran səbəblər və onların mahiyyəti, insan alveri və məcburi əməyi doğuran nəticələr, insan alveri ilə aparılan mübarizə, bu mübarizənin qanuni əsasları, məcburi əmək və onunla əlaqədar aparılan hüquqi tədbirlər və s. barədə təlim keçmişlər.
Tədbirdə insan alveri anlayışı, insan alveri qurbanları və potensial qurbanlarla işləmə prinsipləri, onların sosial və hüquqi müdafiəsi, Azərbaycan regionları üçün spesfik olan insan alverinin baş verməsinin forma və metodları, insan alverinə qarşı mübarizə tədbirləri, cinayətin profilaktikası, insan alveri qurbanlarının müdafiə edilməsi və onlara köməklik göstərilməsinin hüquqi və təşkilati əsasları barədə məlumat verilmişdir. İnsan alveri qurbanlarının reabilitasiyası və reinteqrasiyası, onların müdafiəsi ilə bağlı nəzərdə tutulan çoxşaxəli tədbirlər, insan alveri qurbanları üçün sosial reabilitasiya mərkəzləri, vətəndaşların insan alveri qurbanına çevrilməməsi üçün nələri bilmələri haqda danışılıb.
Təlimdə “İnsan alverinə qarşı mübarizə haqqında” Azərbaycan Respublikası Qanunu, “Azərbaycan Respublikasında insan alverinə qarşı mübarizə üzrə Milli Fəaliyyət Planı” ətraflı təhlil edilmiş, Lənkəran rayonu ərazisində fəaliyyət göstərən ictimaiyyət üzvləri üçün insan alveri ilə mübarizə barədə dolğun bilgilər verilmişdir.
Təlim interaktiv şəraitdə davam etmiş və təlimin sonunda iştirakçıların çoxsaylı sualları təlimçi tərəfindən ətraflı cavablandırılmışdır.
Təlimdə həmçinin bütün iştirakçılara “Hüquqi Yardım” ictimai birliyinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə ərsəyə gətirdiyi “İnsan alveri ağır cinayətdir” adlı bukletlər paylanılmışdır.
Astarainfo.az
