Astarada “Vətən sərhəddən başlayır” devizi ilə Gənclər günü əsgərlərlə birlikdə qeyd edildi.
Fevralın 2-də Astara rayon Gənclər və İdman İdarəsi, Rayon Mədəniyyət Mərkəzi və Astara şəhər Bələdiyyəsinin birgə təşkilatçılığı ilə N saylı hərbi hissədə bir qrup fəal gəncin iştirakı ilə əsgər və zabitlər üçün 2 fevral Azərbaycan Gənclər Günü münasibəti ilə “Vətən sərhəddən başlayır” devizi ilə bayram şənliyi təşkil olunmuşdur.
Tədbirdə Gənclər və İdman İdarəsinin rəisi Ərçə Əliyev Gənclər günü münasibətilə hərbiçiləri təbrik etmiş, onlara xidmətlərini uğurla başa vurmağı arzulamışdır. O, çıxışında 1990-1993-cü illərdə Azərbaycan gənclərinin vəziyyətindən, ümumilli lider Heydər Əliyevin hakimiyyətə gəlişindən sonra gənclərə göstərilən diqqət və qayğıdan bəhs etmiş, Azərbaycan Respublikası Gənclər və İdman Nazirliyinin yaradılması, ilk Gənclər forumu və Gənclər gününün təsis edilməsi haqqında məlumat vermiş, əsası ulu öndər Heydər Əliyev tərəfindən qoyulan gənclər siyasətinin bu gün ölkə rəhbəri cənab İlham Əliyev tərəfindən uğurla davam etdirildiyini bildirmişdir. O həmçinin Astara rayonunda Gənclər siyasətini həyata keçirən Astara rayon Gənclər və İdman İdarəsinin gördüyü işlər haqqında məlumat vermişdir.
Ərçə Əliyev tədbiri açıq elan etdikdən sonra Azərbaycan Respublikası Dövlət Himni səsləndirilmişdir.
Daha sonra çıxış edənlər Astara şəhər Bələdiyyəsinin sədri Aygül Məmmədova, “Astara” qəzetinin baş redaktoru Fəridə Ağazadə, Hərbi hissənin komandiri Rəşad Kərimov hərbiçiləri Azərbaycan gəncləri günü münasibəti ilə təbrik etmiş, onlara uğurlar arzulamışlar.
2 fevral Azərbaycan Gənclər günü münasibəti ilə tədbirdə dövlət sərhədlərinin etibarlı mühafizəsində, ictimai hazırlıqda müsbət nəticələr əldə etdiyinə görə bir qrup sərhədçilər Gənclər və İdman İdarəsinin fəxri fərmanları və xatirə hədiyyələri ilə təltif olunmuşlar.
Tədbirdə həmçinin aprel döyüşlərinin iştirakçısı Orxan Əliyev də iştirak etmiş və döyüşlərdə göstərdiyi şücaətə, rayon gəncləri arasında vətənpərvərlik tərbiyəsinin artırılmasında fəaliyyətinə görə təltif olunmuşdur.
Rayon Mədəniyyət Mərkəzinin “Sevinc” mahnı və rəqs ansamblının konsert proqramı nümayiş olunmuşdur.
Əsgərlər arasında müxtəlif viktorinalar keçirilmiş, rəqslər təşkil edilmişdir.
Sonda xatirə şəkli çəkilmişdir.
Elnur Qurbanlı
Astarainfo.az
